Objektivo Area Studies laos atu sai “matenek nain” hodi aprende lingua ho hetan konhesimentu kona ba sosiedade, politika, ekonomia no kultura iha fatin neebe halo estudu. Importante duni atu hetan konhesimentu ka matenek neebe klean no sistematiku iha fatin estudu nian. Maibe importante liu mak atu komprende karakter ho estrutura indijena, haree husi komunidade laran no ninia abut.
Ba buat hirak nee, ita depende metode neebe uza iha kampu akademiku hanesan Sosiologia, Antropologia, Historia, Arqueologia no seluk-seluk tan. Maibe presiza mos maneira hakbesik inter-disciplina neebe atu konsulta metode kampu akademiku seluk. Por ezemplu, atu avalia dezemvolvimentu ekomomiku ka dezemvolvimentu sosial iha fatin estudu, laos deit presiza Sosiologia no Economia, presiza mos Historia atu hatene mudansa hori uluk no metode Antropologia atu komprende sistema valor povu nian.
Problema lingua neebe presiza ba estudu mos la simples. Ohin loron iha mundu tomak lian Ingles mak ema uza hanesan lingua internasional de facto. Maibe tenki hatene liu lian seluk, por ezemplo iha Amerika Latino lian Espanyol no lian Portugues (Brazileiru), para komprende husi laran ho klean. No mos dala ruma tenki aprende lingua rasa minoria nian ka lingua franca regional, se estuda iha programa doutramento no sai peskizador. Presiza mos atu estuda iha universidade/instituto iha fatin estudu, halo peskiza dokumentos iha arkivo no komete field work neebe tempo naruk.
